Shqipëria mbyll zyrtarisht tre kapitujt e parë të negociatave me Bashkimin Evropian në rrugën drejt anëtarësimit të plotë. Nga Konferenca e nëntë Ndërqeveritare Shqipëri-Bashkimi Evropian, në Bruksel, Komisionerja për Zgjerim, Marta Kos, e cilësoi një moment të madh për Shqipërinë mbylljen e kapitujve, ndërsa bëri thirrje që reformat të vazhdojnë. Marta kos: “Përgëzime për punën dhe për këtë arritje. Inkurajojmë që të vazhdojë progresi në sundimin e ligjit dhe të drejtat themelore, në sistemit e drejtësisë, antikorrupsionin dhe luftën kundër krimit të organizuar”. Nga ana e tij, kryeministri Edi Rama tha se mbyllja e kapitujve tregon vlerësimin e qartë në progresin e vendit. Rama: "Ajo çfarë ndodhi tani shënon vërtet një gur kilometrik tjetër të rëndësishëm në rrugëtimin e pakthyeshëm të Shqipërisë në BE. Ky është një vlerësim i qartë që Shqipëria po ecën përpara, që reformat po japin rezultate dhe që vendi ynë është gjithnjë më i përgatitur për të marrë përsipër përgjegjësitë e anëtarësimit”.