Bota uron Shtetet e Bashkuara të Amerikës për 250-vjetorin e Pavarësisë. Mesazhe urimi u përcollën nga liderët kryesorë në botë, nga Bashkimi Evropian, te Rusia e Japonia. Presidentja e Komisionit Evropian, Ursula Von der Leyen, theksoi se për 250 vjet, partneriteti transatlantik është formësuar nga vlerat e përbashkëta dhe lidhjet familjare. “Statuja e Lirisë mbetet simboli i qëndrueshëm i asaj miqësie të përhershme, prandaj sonte, fishekzjarret do të ndriçojnë qiellin në të dy anët e Atlantikut”, tha Von Der Leyen në urimin e saj. Mesazhe urimi për Ditën e Pavarësisë u përcollën dhe nga Shqipëria e Kosova. Kryeministri Edi Rama shkroi në rrjetet sociale se “me 4 Korrikun e Amerikës së mishëruar në Statujën e Lirisë, që është një simbol i veçantë edhe për shqiptarët e rritur në histori përballë erërave kundër, të cilat gjithnjë janë rrekur ta ndalin frymën e këtij vendi, ju uroj një fundjavë të mbarë”. Kryeministri në detyrë i Kosovës, Albin Kurti, publikoi Deklaratën e Pavarësisë amerikane, duke e cilësuar si një dokument me vlera universale, që vazhdon të frymëzojë popujt në mbarë botën. Papa Leone, i cili muajt e fundit është përfshirë në një marrëdhënie të tensionuar me Presidentin amerikan, shpërndau në kanalet zyrtare të Vatikanit një mesazh për rastin. Leone përgëzoi historinë amerikane dhe idealet e lirisë, drejtësisë e unitetit, dhe njëkohësisht bëri thirrje që SHBA të mbetet besnike traditës së saj si vend i emigrantëve. Mesazh urimi erdhi edhe nga Mbreti Charles, i cili theksoi se marrëdhëniet mes Londrës dhe Uashingtonit do të vazhdojnë të mbështeten mbi vlerat e përbashkëta. Kulla e Tokios në Japoni u ndriçua me ngjyrat e flamurit amerikan. Në kuadër të festimeve u hodhën fishekzjarre, ndërsa një shfaqje me dronë shfaqi në qiell portretet e kryeministres Takaichi dhe Presidentit të SHBA-së, Donald Trump. Vladimir Putin, në një letër të botuar nga Kremlini, përcolli mesazhin e përgjegjësisë që SHBA dhe Rusia kanë si dy fuqitë kryesore bërthamore për sigurinë e gjithë globit.