Top Channel/ Shqipëria blen dronët turq/ Do përdoren për monitorimin e territorit & të rendit publik

Fama e dronëve të armatosur turq shtrihet akoma edhe më shumë. Një tjetër vend zgjodhi Turqinë për të forcuar mbrojtjen e tij kombëtare. Shqipëria, thotë TRT përgatitet të fusë në inventarët e saj dronët e armatosur turq, fjala e fundit e teknologjisë. Ndërkohë sipas medias turke “Yeni Şafak”, marrëveshja është konkretizuar.“Yeni Şafak” zbulon edhe tipin e dronëve superinteligjentë, tip IHA dhe SİHA prodhuar nga “Baykar Defense” në Turqi. Mjetet ajrore pa pilot, IHA janë pa armatim, ndërsa tipi tjetër është i armatosur. Lajmi mbërrin pas vizitës së ministrit të brendshëm Bledar Çuçi dhe autoritete ushtarake, vazhdon TRT, e cila citon ministrin të pohojë se “sistemi i dronëve të armatosur turq mund të përdoret për qëllime civile dhe ushtarake në Shqipëri”. Këto komente ai i bëri në vazhdën e vizitës në fabrikën e prodhimit të firmës Bayraktar në Stamboll. gjatë vizitës së tij disa javë më parë në Turqi, kryeministri Edi Rama njoftoi arritjen e një marrëveshje për pajisjen e vendit me dronë inteligjentë që do të shërbenin për monitorimin e territorit. Ai shpërndau dhe foto nga takimi me ekspertët turq dhe tha se bëhej fjalë për dronë që do të mblidhnin dhe do përcillnin dhëna në kohë reale mbi rrugët, bregdetin, tokën bujqësore, pyjet rendin publik e te tjera. Në një relacion të mëvonshëm, pas ndryshimit të buxhetit me akt normative për të lejuar shpenzimin e 1 miliardë lekëve për Ministrinë e Mbrojtjes për pajisjen me drone, nuk sqarohej nëse bëhej fjalë për dronë ushtarakë, por shtypi turk thotë se dy variantet e përmendura prej tij kanë municione të integruara.