Shqipëria zhvillon zgjedhjet e 9-ta pluraliste, të cilat përkojnë me një vit jubile. Të parat zgjedhje të këtij lloji u mbajtën 30 vjet më parë, e në tre dekada, shumë gjëra kanë ndryshuar, por konfrontimi tejet i madh mes dy partive politike, jo. Kryeministri socialist, Edi Rama kërkon një mandat të tretë, e nëse ia del, thekson DË, kjo do të ishte një risi për vendin ku asnjë parti nuk ka arritur të sigurojë më parë tre mandate rresht për qeverisje. Një garë kjo kokë më kokë, vëren Reuters, mes socialistëve në pushtet dhe opozitës teksa korrupsioni rëndon fort mbi votuesit e njërit prej vendeve më të varfra të Europës. Vështirë të mos përmendej nga gjigandi mediatik vrasja e një mbështetësi te PS-së ën qytetin e Elbasanit, dhe plagosja e katër personave të tjerë, incidenti më i rëndë i fushatës zgjedhore, që shënoi pikën kulmore të një spiraleje tensionesh, e që pavarësisht përpjekjeve të mëdha e thirrjeve për qetësi, riktheu hijen e dhunës paralektorale, që pat shënjuar edhe zgjedhje të meparshme.