Tre te rinj, turistë gjermanë u shpëtuan pas një operacioni të vështirë kërkim-shpëtimi në Malin e Çikës, pasi kishin mbetur të bllokuar mes shkëmbinjve dhe kishin kërkuar ndihmë përmes sinjalit SOS. Sipas informacioneve, tre të rinjtë humbën orientimin gjatë ecjes në terrenin e vështirë malor, ndërsa dyshohej se njëri prej tyre kishte pësuar probleme shëndetësore. Menjëherë pas marrjes së sinjalit të emergjencës, u organizua një operacion i gjerë kërkim-shpëtimi, ku u angazhuan efektivët e forcës speciale Delta Force, shërbimet e Policisë së Vlorës, punonjës të Administratës së Zonave të Mbrojtura, si dhe një helikopter për ndërhyrje nga ajri. Pas rreth katër orësh operacion në një zonë tepër të vështirë dhe shkëmbore, helikopteri bëri të mundur nxjerrjen e tre turistëve, të cilët u transportuan drejt Qendrës Shëndetësore të Palasës, ku morën ndihmën e parë mjekësore. Fatmirësisht, operacioni u përmbyll me sukses, pa pasoja për jetën e tyre. Ky është rasti i pestë brenda pak ditësh që strukturat e Policisë së Shtetit, forcat e specializuara dhe institucionet e tjera të angazhuara në emergjencat civile ndërhyjnë për të shpëtuar turistë të huaj që humbin orientimin në zonat malore dhe pyjore të qarkut të Vlorës. Autoritetet u bëjnë apel turistëve që përpara se të ndërmarrin shtigje malore të informohen për itinerarin, të përdorin pajisje orientimi dhe të mos lëvizin në zona të panjohura pa guida, për të shmangur situata që mund të rrezikojnë jetën e tyre dhe të kërkojnë angazhimin e operacioneve të vështira të kërkim-shpëtimit.