Të paktën tre persona kanë vdekur dhe disa të tjerë janë lënduar pas shpërthimit në një ndërtesë në Hagë. Lajmin e ka konfirmuar kryebashkiaku i qytetit holandez, Jan van Zanen, i cili ka deklaruar se ka edhe shumë të tjerë të bllokuar nën rrënoja. Ekipet e shpëtimit po kërkojnë në rrënojat e një ndërtese trekatëshe banimi në Hagë, që u shemb pas një shpërthimi, që shkaktoi zjarr masiv mëngjesin e 7 dhjetorit. Shkaku i shpërthimit ende nuk është i qartë, por policia bëri thirrje për informacione pasi një veturë është parë duke u larguar me shpejtësi nga vendi i ngjarjes pak pas shpërthimit. Të paktën pesë shtëpi janë shkatërruar nga ky shpërthim, thanë autoritetet, por ende mbetet e paqartë se sa janë të bllokuar nën rrënoja. Shtëllunga të tymit janë parë duke dalë nga një vrimë e madhe që është krijuar në vendin ku gjendej ndërtesa e shembur.