Dy persona janë lënduar nga shpërthimi i së mesnatës së të hënës në Veri të Mitrovicës. Sic njofton Policia e Kosovës, shpërthimi erdhi nga një granatë dore që u hodh nga disa persona pranë një lokali në këtë zonë. “Ngjarja ndodhi në orën 23:50 të 15 janarit, kur tre persona, të nacionalitetit serb – dy prej të cilëve u plagosën – dolën nga një lokal i njohur si "Bishevac" në Mitrovicë të Veriut dhe me të dalë, një veturë u është afruar, prej së cilës është hedhur një granatë dore”, thuhet nga Policia e Kosovës. Ndërkohë, gjendja shëndetësore ë njërit prej të lënduarve është e rëndë. Për mediat serbe në Veri të Mitrovicës drejtori i Spitalit të këtij qytetit ka bërë të ditur se i njëjti është jashtë rrezikut për jetën. “Të gjitha procedurat diagnostike dhe konsultimet me specialistë të tjerë janë ende duke u bërë. Gjatë ditës do të vendoset nëse ai do të vazhdojë trajtimin në këtë qendër, apo do të ketë nevojë për trajtim në një institucion tjetër shëndetësor terciar në nivel të Serbisë” ka thënë Zllatan Elek. Policia e Kosovës ka nisur hetimet për zbardhjen e rastit dhe kapjen e autorëve. Ky nuk është rasti i vetëm i shpërthimeve të tilla në Mitrovicë të Veriut, pasi dy vitet e fundit këto janë shpeshtuar, përfshi edhe shpërthimet në institucionet publike.