Kur kanë kaluar 347 ditë nga nisja e luftës mes Izraelit dhe Hamasit, duket se edhe hackerat kanë hyrë në sulm. Sot në mesditë mijëra pajisje gjurmimi dhe komunikimi që përdornin anëtarë të grupit të Hezbollahut shpërthyen njëkohësisht në Bejrut dhe Damask të Sirisë, duke shkaktuar tetë të vdekur dhe rreth 3000 të plagosur. Mediat raportojnë se shpërthimet u shkaktuan nga një sulm i hackerave izraelitë në rrjetet e komunikimit të brendshëm të Hezbollahut. Një funksionar i Hezbollahut deklaroi për Ëall Street Journal se ekzistojnë dyshime për sasi eksplozivi që kanë shkaktuar shpërthimin e pajisjeve. Shumë pjesëtarë të organizatës e kanë kuptuar tejnxehjen e pajisjeve dhe i kanë larguar ato përpara se të shpërthenin. Grupi i Hezbollahut ishte furnizuar së fundmi me pajisjet e komunikimit dhe dyshohet se shërbime sekrete izraelite i kishin manipuluar, duke vendosur brenda secilës një sasi eksplozivi, të cilën e kanë aktivizuar njëkohësisht nëpërmjet një mesazhi që ka mbërritur njëkohësisht në të gjitha pajisjet. Hezbollahu ka akuzuar Izraelin si përgjegjësin e këtij sulmi, dhe ka paralajmëruar se do të hakmerret. Sipas mediave në Liban, mes viktimave nga shpërthimet është edhe djali i deputetit libanez të hezbollahut Ali Ammar, por edhe një vajzë 10 vjeçare. Çdo anetar i grupit libanez të Hezbollahut e përdor këtë lloj pajisje për të marrë mesazhet nga eprorët apo nga familjarët e tyre, në mënyrë që të shmanget komunikimet me celular që cilët mund të përgjohen lehtësisht.