Opozita vijoi me protestën e radhës të mbajtur përpara Kryeministrisë, të quajtur “Foltore 2”. Në fjalën e tij, lideri i PD-së, Sali Berisha, u bëri thirrje qytetarëve të marrin pjesë në protestën e dytë kombëtare më 24 janar. “Të dashur miq, viti 2026 do shkruhet me gërma të arta në muret e kohës si viti i anti-diktaturave, si viti në të cilin popujt e autokracive arritën t’i përmbysin njëra pas 6jerës ato. Prej dy javësh, rrugët e Teheranit janë të mbushura me opozitarë të guximshëm trima, të cilët pavarësisht nga masakrat, breshëritë e Ajetullahëve, ecin të sigurt drejt fitores. Asgjë nuk mund të ndalë një popull të vendosur për të mbrojtur idealët e lirisë. Asgjë nuk mund të ndalë hovin e tyre për të triumfuar. Ne vijmë këtu sepse besojmë te idealët tona të drejta dhe besojmë se këto ideale do të triumfojnë së shpejti. Ne kemi përballë sot regjimin më karikaturial, më të turpshëm, më të dekompozuar në Europë dhe Botë. Regjimin që kudo që ta prekësh rrjedh vjedhje, vjedhje dhe vetëm vjedhje të shqiptarëve. Regjim i cili mbahet në këmbë me mashtrime, me propagandë, me trillime. Regjimi që pret nga ne qytetarë, t’i japim ndëshkimin që meriton. Edi Rama, ndërkohë që shqiptarët janë të vendosur t’i japin ndëshkimin e merituar, po ecën drejt grushtit të shtetit, drejt bllokimit të pushtetit të drejtësisë. Në një akt të papërgjegjshëm, sfidon dhe poshtëron shqiptarët, duke nxjerrë maskën e tij, Lubi Ballukun, për t’iu thënë atyre që ne nuk pyesim për ju. Edi Rama, edhe ne nuk do të pyesim për ju dhe do të kesh fatin që meriton.