Të tjera raketa u lëshuan gjatë orëve të mbrëmjes nga Gaza në drejtim të qyteteve izraelite. Por ato nuk arritën të shpërthenin pranë destinacioneve përkatëse pasi u kapën nga sistemi raketor I mbrojtjes izraelite. Teksa militantët e Hamas po vijojnë bombardimet, nga ana tjetër ushtria izraelite është bërë gati për të nisur një sulm tokësor. Të gjitha forcat janë bërë gati në kufi dhe po presin urdhrin për nisjen e misionit masiv – dhe potencialisht të gjatë. Sipas deklaratës së lëshuar nga ushtria e Izraelit para pak orësh ofensiva do të jetë gjithëpërfshirëse nga toka, deti dhe ajri. Ajo është zotuar të fshijë Hamasin nga faqja e dheut. Qëllimi i Operacionit Shpatat e Hekurt është një nga më ambiciozët që forcat ushtarake izraelite mund të kenë planifikuar më herët në Gaza. Vetë kryeministri Benjamin Netanyahu vizitoi gjatë ditësh ushtarët në vijën e frontit ndërsa theksoi se çdo gjë është gati dhe se faza tjetër po vjen. Por nga ana tjetër, palestinezët po vijojnë largimet nga Gaza, që tashmë krahas shkatërrimit, po vuan mungesën e ujit të pijshëm, ushqimeve si dhe energjisë elektrike. Kajro, Tel Avivi dhe Ëashingtoni arritën ndërkohë një marrëveshje për t’i lejuar të huajt që janë në Gaza, të largohen përmes pikës kufitare të Rafahsë drejt Egjiptit. Izraeli ka pranuar t`u ndalojë sulmet në zonat ku do të kalojnë të huajt që i largohen Gazës së rrethuar. Në negociata është përfshirë dhe Katari, ndërsa mësohet se pjesëmarrësit kanë marrë miratimin e grupeve militante palestineze, Hamas dhe Xhihadi Islamik. Ndërkohë shumë palestinezë po largohen nga veriu I Gazës drejt jugut për t’I shpëtuar sulmit masiv. Kurse të tjerë po gjejnë strehim pran shkollave dhe spitaleve. Komisioni Europian njoftoi se do të trefishojë ndihmën humanitare për Gazën. Si pasojë e sulmeve të nisura një javë më parë nga militantët e Hamas humbën jetën mbi 1300 izraelitë, si dhe u morën peng mbi 150 të tjerë. Ndërsa nga radhët e palestinezëve janë vrarë nga bombardimet mbi 1900 persona. Pamjet: AFP