I ashtuquajturi Asociacioni i Qytetarëve të Qarkut të Mitrovicës ka paralajmëruar se nisur nga data gjashtë shtator, do të bllokojnë pikë kalimet kufitare të Serbisë me Kosovën. Sipas kryetarit të këtij asociacioni, Rasha Rojeviq, bllokadat do të zgjasin deri kur Policia e Kosovës të largohet nga veriu i Kosovës. Ai po ashtu ka bërë të ditur se në bllokada nuk do të marrin pjesë serbët e Veriut të Kosovës, por vetëm ata të Serbisë, Malit të Zi dhe Republikës Serbe e që do të bllokojnë pikat kufitare të Jarinjës, Bërnjakut, Mendares, Dheut të Bardhë dhe Kullës. Nisur nga ky paralajmërim, Ministria e Punëve të Jashtme të Kosovës u ka kërkuar të gjithë qytetarëve të shmangin kalimin tranzit nëpër Serbi. “Ministria e Punëve të Jashtme dhe Diasporës u bën thirrje të gjithë shtetasve të Republikës së Kosovës, përfshirë pjesëtarët e mërgatës, që kanë planifikuar apo janë duke planifikuar kalimin tranzit përmes territorit të Serbisë, të shmangin të gjitha hyrjet dhe daljet në vendkalimet kufitare mes Kosovës dhe Serbisë”, thuhet në njoftimin e MPJD-së. Paralajmërimi për bllokada vjen pasi më 30 gusht, Policia e Kosovës mbylli pesë komuna paralele në veri të vendit. Këto struktura paralele në Zveçan, Zubin Potok, Mitrovicë të Veriut dhe Leposaviq dyshohet se lëshonin dokumente të falsifikuara. Në kundërshtim të mbylljes së tyre, ish-punëtorët e komunave paralele protestuan tre ditë para objekteve. Ndërkohë që pesë ish-udhëheqës të këtyre strukturave u ftuan nga Policia e Kosovës për t’u intervistuar, për çka Lista Serbe të enjten akuzoi institucionet e Kosovës nën pretendimet se po lë serbët pa marrë shërbime.