Një tërmet me magnitudë 7.1 të shkallës rihter tronditi të martën Japoninë Jugore, duke lënë rreth 100 të plagosur, disa prej tyre në gjendje të rëndë. Mediat botërore raportojnë se shumë njerëz kanë mbetur të bllokuar brenda një qendre tregtare, ku dyshohet të ketë edhe të vdekur. Pas tërmetit të fuqishëm, brenda qendrës tregtare pati shpërthime dhe më pas një pjesë e godinës u shkatërrua plotësisht, duke bllokuar brenda shumë persona. Gjithashtu, autoritetet raportuan për shumë persona të zhdukur edhe në një fabrikë të zonës, pasi oxhaku i ndërtesës u shemb nga lëkundjet, duke bllokuar njerëzit brenda ndërtesës. Pas tërmetit u raportua për ndërprerje masive të energjisë elektrike, duke lënë në errësirë rreth 40 mijë shtëpi, ndërsa u dëmtuan rrugë, ura e ndërtesa. Rreth 300 mijë njerëz janë evakuuar, ndërsa në zonë raportohet për lëkundje të njëpasnjëshme dhe të forta, duke sjellë dhe rrëshqitje toke. Deri më tani, autoritetet japoneze thanë se janë regjistruar mbi 60 lëkundje të tjera deri në 4 ballë, ndërsa fillimisht u lëshua alarmi edhe për cunami, por u hoq dy orë pas tërmetit të parë.