Një shqiptar ndërroi jetë përgjatë pelegrinazhit në Medinë. Lajmin e bëri të ditur kryetari I komunitetit mysliman, Bujar Spahiu në një postim në Facebook. “U informova nga drejtuesi i haxhit, z. Lauren Luli, se haxhiu Sulejman Koloriu ka ndërruar jetë në qytetin e bekuar të Medines. Pasi ka kryer ritin e Haxhit dhe ka shkuar në qytetin e Profetit (a.s.), Medine, për vizitë, pjesë e axhendës, haxhiu i nderuar ka ndërruar jetë.”, u shpreh kreu I komunitetit mysliman të Shqipërisë. Sulejman Koloriu kishte shkuar në Medinë bashkë me një grup besimtarësh myslimanë; një traditë kjo e përvitshme. Por gjatë peligrinazhit ai humbi jetën. “I shpreh ngushëllimet më të sinqerta familjes Koloriu dhe të afërmve të haxhiut. I lutem Zotit që t’i ketë pranuar haxhin Sulejmanit dhe ta bëjë atë prej banorëve të Xhennetit Firdeus. Vdekja është e hidhur gjithmonë, por është ligj! Kur njeriu ndërron jetë fill pas kryerjes së haxhit dhe varroset në një qytet me Profetin (a.s.) është një shenjë shpresëdhënëse dhe lehtëson disi hidhërimin e familjarëve. Qoftë i Xhennetit haxhiu i nderuar Sulejman Koloriu!”, mbylli postimin në rrjetet sociale kreu I komunitetit mysliman, Bujar Spahiu. Pamjet: AFP