Një ngjarje e rëndë është regjistruar disa netë më parë pranë Kishës së Madhe në Shkodër, ku një drejtues mjeti dyshohet se ka përplasur me makinë katër persona pas një konflikti të çastit. Sipas informacioneve paraprake, pas debatit mes palëve, shoferi ka përplasur me automjet katër persona. Mësohet se personat e përfshirë i janë kundërpërgjigjur duke e goditur me grushte drejtuesin e mjetit, ndërsa më pas në vendngjarje ka ndërhyrë Policia. Burime bëjnë me dije se të gjithë personat e përfshirë në ngjarje janë marrë në pyetje nga uniformat blu, ndërsa drejtuesi i mjetit është ndaluar dhe po hetohet në lidhje me rrethanat e ngjarjes. Hetuesit dyshojnë se bëhet fjalë për një konflikt të çastit, por motivet dhe dinamika e plotë e incidentit mbeten ende të paqarta. Policia vijon veprimet hetimore për zbardhjen e plotë të ngjarjes dhe përcaktimin e përgjegjësive ligjore të personave të përfshirë.