Privatizimi i ish-klubit sportiv “Partizani” duket se ka qenë një plan i mirëmenduar, duke shfrytëzuar çdo institucion në varësi dhe ushtrimin e ndikimit të pushtetit si kryeministër nga Sali Berisha, i cili tashmë është i dyshuar për veprën penale “Korrupsionit pasiv të funksionarëve të lartë shtetërore ose të zgjedhurve vendorë”, dhe Gjykata e Posaçme e ka lënë në masën e sigurisë detyrim paraqitje si dhe i ka ndaluar të dalë jashtë vendit. Veprimet aktive të tij nisin që në vitin 2005 kur vjen në pushtet. Një vendim i Këshillit të Rregullimit të Territorit që mban firmën e Berishës, ndryshon destinacionin e një sipërfaqjeje prej 0.7 hektarë nga zonë sportive në zonë banimi, megjithëse ndodhej brenda kompleksit sportiv “Partizani”. Për shkak të mosrakordimit me Ministrinë e Mbrojtjes ku klubi i futbollit “Partizani” herë përfshihet në planin e përhapjes e herë jo, dhe nuk po arrihej regjistrimi i pronës në Zyrën Vendore të regjistrimit të pasurive, Berisha ndryshon ligjin për kthimin dhe kompesimin e pronave duke e shtyrë afatin deri në 1 tetor 2007, dhe heq disa kufizimeve duke lejuar kthimin e pronave në administrim të Ministrisë së Mbrojtjes nëse janë jashtë strukturave të Forcave të Armatosura. Po ashtu ish-pronarëve u kthehen ndërtimet e përhershme që nuk përdoren për interes publik dhe deri në privatizim shteti i paguan qira ish-pronarit. Po me propozim të tij u krijua agjencia e kthimit dhe kompesimit të pronave ku aktiviteti i saj përcaktohej nga Këshilli i Ministrave dhe jo nga Kuvendi si dikur. Edhe emërimet e drejtuesit të kësaj agjencie vinin me propozim të kryeministrit duke shtuar kështu pushtetin e tij. SPAK vëren se institucionet kanë vepruar me shpejtësi për kthimin e këtyre pronave bazuar edhe vetëm në fotokopje dokumentesh pa vlerë juridike. E paqartë mbetet edhe një sipërfaqe prej mbi 4 mijë m2 e trashëgimtarëve Begeja, e cila ndodhej jashtë klubit sportive por komisioni i kthimit të gjithë sipërfaqen e tokës prej 28 mijë m2 e ka kthyer brenda kompleksit sportiv duke krijuar një sipërfaqe fiktive.