Dhoma e Përfaqësuesve e kontrolluar nga republikanët votoi të martën për shkarkimin e sekretarit të Sigurisë Alejandro Mayorkas. Ligjvënësit konservatorët, të cilët e fajësojnë shefin e emigracionit të Biden, për rritjen e hyrjeve ilegale nga Meksika, miratuan dhe dy nene akuzash për t’u ngritur ndaj Sekretarit Mayorkas, për “refuzim të vullnetshëm dhe sistematik” për të zbatuar ligjin e imigracionit si dhe “shkelje të besimit të publikut”. Çështja do t’i kalojë senatit, ku dhe më pas do të mbahet gjykimi ndaj Alejandro Mayorkas, i cili bëhet kështu anëtari i parë i kabinetit amerikan që po përballet me këtë procedurë në pothuajse 150 vjet. Votimi u cilësua nga presidenti Biden si një akt antikushtetues i ndërmarrë për arsye politike. Gjatë kohëve të fundit në SHBA ka hyrë një numër rekord emigrantësh të paligjshëm përmes kufirit me Meksikën. Për këtë gjë Mayorkas ka deklaruar se ai nuk ka përgjegjësi për situatën në kufi dhe se nuk e ka shpërdoruar detyrën. Ndërkohë Senati, i cili kontrollohet nga demokratët, që kanë 51 vende, ka pak gjasa që të mbështet largimin nga detyra të sekretarit të Sigurisë Alejandro Mayorkas.