Situata me zjarret paraqitet e qëndrueshme gjatë 24 orëve të fundit, ndonëse 4 vatra zjarri mbeten ende aktive dhe 3 nën mbikëqyrje. Në operacionet e shuarjes janë angazhuar në total 330 forca operacionale dhe 35 automjete zjarrfikëse, ndërsa Forcat e Armatosura kanë mbështetur operacionet me 50 efektivë dhe 1 helikopter. Aktualisht, vëmendja kryesore është në Qarkun Dibër, ku mbeten aktive dy vatra. Në Qafë të Helmës në Bulqizë, vijon puna në një sipërfaqe me shkurre dhe pisha, me 23 forca operacionale të angazhuara; nuk ka rrezik për zonat e banuara. Ndërsa në Vajkal vatra ndodhet në terren shkëmbor me shkurre dhe dëllinja, ndërsa puna e forcave zjarrfikëse në terren vijon. Dy vatra aktive zjarri janë edhe në Elbasan. Në Malin e Dardhës në Librazhd, zjarri është izoluar dhe mbahet nën kontroll nga forcat në terren, pa rrezik për banesat. Në Malin e Qukësit, Prrenjas, vijon puna për shuarjen e trungjeve dhe bimësisë së ulët brenda perimetrit të vatrës, por zjarri nuk ka rrezik për zonat e banuara. Ndërkohë, vatra në Malin e Polisit mbahet nën mbikëqyrje për të parandaluar riaktivizimin.