Kapriçot e motit vijojnë të sjellin pasoja të konsiderueshme tek fermerët çdo verë. Pas reshjeve intensive të shiut dhe stuhive që kanë përfshirë qarkun e Elbasanit ditët e fundit, pasditen e së mërkurës fshati Drizë në bashkinë e Gramshit është goditur nga një breshër i fortë, i cili ka dëmtuar sipërfaqe të tëra të mbjella dhe vreshta. Sipas banorëve të zonës, stuhia ka qenë e shkurtër në kohëzgjatje, por me intensitet të lartë. Brenda pak minutash, breshëri ka goditur kulturat bujqësore, duke shkaktuar dëme të konsiderueshme sidomos në pemtari. Fermerët tregojnë se janë prekur veçanërisht parcelat me perime, kulturat foragjere dhe vreshtat, të cilat përbëjnë një nga burimet kryesore të të ardhurave për familjet e zonës. Banorët kërkojnë ndërhyrjen e institucioneve përgjegjëse për të kryer verifikimin dhe vlerësimin e dëmeve në terren, ndërsa shpresojnë për mbështetje në përballimin e humbjeve të shkaktuara nga moti i keq. Pasditja e së premtes shënoi reshje të dendura shiu në të gjithë qarkun e Elbasanit. Prrenjasi e Librazhdi gjithashtu patës stuhi shiu por pa dëme tek fermerët