Tre të rinj në Durrës u arrestuan pasi vepronin si grup për të shitur doza kokaine në plazh. Policia ka sekuestruar një sasi lëndë narkotike kokainë e ndarë në dhjetëra doza, një peshore elektronike dhe 3 celularë, si dhe arrestoi dy kushërinj dhe shokun e tyre. Në kuadër të shtimit të kontrolleve dhe aksioneve të policisë në zonën bregdetare të qarkut, me qëllim parandalimin dhe goditjen e paligjshmërive dhe si rezultat i një hetimi njëmujor me metoda proaktive është organizuar dhe finalizuar operacioni policor antidrogë i koduar “Periudha”. Në bazë të provave të siguruara, specialistët e Seksionit për Hetimin e Narkotikëve dhe Trafiqeve të Paligjshme të DVP Durrës, në bashkëpunim me shërbimet e Forcës së Posaçme “Shqiponja” të kësaj drejtorie, kapën dhe vunë në pranga shtetasit Renato Leci, 21 vjeç dhe Elvis Leci, 19 vjeç, të dy banues në Arapaj, Durrës, si dhe shtetasin Endri Mëzhika, 22 vjeç, banues në Xhafzotaj, Durrës. Nga veprimet hetimore dyshohet se këta 3 shtetas vepronin në formën e një grupi, me qëllim sigurimin dhe shitjen në doza, të lëndës narkotike kokainë, në zonën e plazhit të Durrësit. Gjatë kontrolleve, këtyre shtetasve iu gjetën dhe iu sekuestruan në cilësinë e provës materiale, një sasi lëndë e dyshuar narkotike kokainë e ndarë në dhjetëra doza të gatshme për shitje, një peshore elektronike dhe 3 celularë. Hetimet e mëtejshme do të kryhen nga prokuroria e Durrësit.