Reshjet masive të shiut dhe dëborës, që kanë përfshirë të gjithë vendin këtë të hënë, kanë shkaktuar probleme në disa akse kryesore. Reshjet e pandërprera të dëborës për disa orë me radhë bllokuan Rrugën e Arbrit, në pjesën “By pass-Qafë Murrizë”. Me dhjetëra makina u bllokuan në rrugë, ndërsa policia riktheu qarkullimin nga aksi i vjetër rrugor Klos-Burrel-Ulëz. Probleme me qarkullimin nga reshjet e dendura të dëborës janë krijuar edhe në disa akse të tjera kryesore në Kukës, Shkodër e Korçë, ku lëvizja e mjeteve bëhet vetëm me zinxhirë. Në aksin Kukës-Bushtricë, disa automjete u bllokuan si pasojë e dëborës, ndërsa drejtuesit u ankuan për mungesë të borëpastrueseve. Reshjet e dendura të dëborës kanë përfshirë prej disa orësh edhe Qarkun e Elbasanit, por deri më tani nuk raportohet për probleme në qarkullim. Ndërkohë, në zonat bregdetare u krijuan probleme nga reshjet e dendura të shiut. Në Durrës, dy tragete u përplasën në Port, në tentativë për t’u ankoruar, ku fatmirësisht nuk pati të lënduar, por vetëm dëme materiale. Gjatë manovrave për t’u ankoruar, helika e njërit traget kapi spirancën e mjetit tjetër lundrues, duke u dëmtuar dhe për pasojë, duke kryer lundrimin në kthim pa pasagjerë. Po ashtu, një peshkarexhë që qëndronte prej kohësh e ankoruar, u fundos në basenin e portit të peshkimit, pasi mori ujë për shkak të kushteve të këqija atmosferike. Ndërkohë, vonesa të shumta pati në mbërritjen dhe nisjen e shumë trageteve, ndërsa është pezulluar puna në terminalin e mallrave gjeneralë dhe atë të rifuxhos. Po ashtu, reshjet me intensitet të lartë kanë rikthyer frikën e përmbytjeve në qytetin e Vlorës, ndërsa përgjatë gjithë ditës nuk u lejua dalja në det e anijeve të peshkimit dhe atyre të tonazhit të ulët, si pasojë e dallgëve dhe erës së fortë në det. Bashkia ka paralajmëruar qytetarët të mos parkojnë makinat në disa zona me risk të lartë. Ndërkohë në Lezhë raportohet për rreth 15 mm reshje shiu, por nuk paraqiten probleme ne rrjetin e kullimit. Funksionimi i rrjetit te kullimit dhe argjinaturat mbahen ne monitorim.