Gjykata Kushtetuese me kërkesë të grupit parlamentar të PD, deputetëve që njihen si grupi Alibeaj” ka shfuqizuar Bordin e kontrollit të çmimeve. Në njoftimin e Gjykatës Kushtetuese bëhet me dije se aktet normative nuk plotësojnë kriteret kushtetuese të parashikuara në nenin 101 të Kushtetutës dhe për këtë arsye u vendos shfuqizim i ligjit. Ky bord ishte ngritur në 18 mars të vitit 2022 dhe kishte për qëllim vendosjen e çmimeve tavan për disa produkte ushqimore bazë si vaji mielli sheqeri orizi e të tjerë. Bordi u krijua pas rritjes së inflacionit që rriti ndjeshëm dhe çmimet në Shqipëri por dhe në të gjithë botën si pasojë e luftës në Ukrainë. Gjykata Kushtetuese e quajti këtë bord si të papajtueshëm me Kushtetutën e Republikës së Shqipërisë. Për këtë vendim ka reaguar dhe deputetja e Partisë Demokratike Jorida Tabaku e cila paraqiti padinë e nënshkruar nga 29 deputetë demokrate. Ajo thotë se “Gjykata Kushtetuese shpëton shqiptarët nga bordet socialiste dhe i jep të drejtë grupit parlamentar të PD! Bordi çmimeve të ushqimeve është antikushtetues! Bordi komunist, që në periudhë krize ka vendosur çmime abuzive në kurriz të xhepave të shqiptarëve duke rritur me të paktën 30% çmimet e shportës dhe duke bërë biznes me krizën e shqiptarëve, tanimë është nul! Shpresoj shumë që ky të jetë një fillim i mirë dhe për vendimin mbi bordin e karburanteve”, tha ajo.