Një konflikt i mbartur prej disa javësh mes dy të rinjve, të cilët njiheshin që prej fëmijërisë, përfundoi në mënyrë tragjike në Korçë me vrasjen e 20-vjeçarit Johan Zuko. Për ngjarjen e rëndë është arrestuar Kristjan Sterjo, 20 vjeç, i cili dyshohet se e qëlloi me armë zjarri shokun e tij të fëmijërisë dhe më pas u largua nga vendi i ngjarjes, duke u fshehur për rreth gjashtë orë. Ngjarja ndodhi rreth orës 16:30 në rrugën “Viktor Eftimiu”, në lagjen nr. 15 të Korçës, pranë zonës ku banonte viktima. Një konflikt mes disa personave u përshkallëzua deri në përdorimin e armës së zjarrit, ndërsa Johan Zuko mbeti i vrarë. Në orët e para pas ngjarjes, policia identifikoi autorin e dyshuar dhe nisi kërkimet për kapjen e tij. Në operacion u angazhuan edhe Forcat Speciale RENEA, ndërsa kontrolle u kryen në banesën e Sterjos, në zonën e varrezave dhe në hapësira të tjera ku dyshohej se mund të ishte fshehur. Pas disa orësh, 20-vjeçari u lokalizua dhe u arrestua në afërsi të banesës së tij, pranë Mitropolisë. Sipas të dhënave të siguruara, ai kishte kaluar rreth gjashtë orë i fshehur në zonën e njohur si “Fusha e Drurëve”, pranë varrezave të qytetit, përpara se të largohej nga aty dhe të afrohej drejt banesës. Policia bëri të ditur se gjatë kontrolleve u gjet dhe u sekuestrua edhe arma e zjarrit që dyshohet se është përdorur në krim. “Identifikohet, kapet dhe arrestohet, pas disa orësh kërkimesh nga shërbimet e Policisë, autori i dyshuar i vrasjes së ndodhur pasditen e djeshme në Korçë.” Në njoftimin zyrtar thuhet se 20-vjeçari dyshohet se vrau me kallashnikov Johan Zukon pas një konflikti për motive të dobëta. “Vrau me armë zjarri, kallashnikov, shtetasin J. Z., 21 vjeç, pas një konflikti për motive të dobëta, arrestohet shtetasi K. S., 20 vjeç, banues në Korçë.” Po sipas Policisë, arma u sekuestrua në cilësinë e provës materiale. “Sekuestrohet, në cilësinë e provës materiale, arma e zjarrit pushkë automatike, e dyshuar se është përdorur në ngjarje.”