Ministri i Bujqësisë, Andis Salla, nuk i shpëtoi përballjes në Kuvend me deputetin socialist, Erjon Braçe, ndonëse refuzoi disa kërkesa të tij për interpelancë. Dy socialistët u përplasën me tone të ashpra në seancën e të enjtes. Ministri po fliste për projektligjin “Për nënproduktet me origjinë shtazore”, por ndërhyrjet e deputetit ishin të ashpra. Tensionet në Kuvend mes dy socialistëve vijuan edhe me tej, duke bërë që drejtuesja e Kuvendit, nënkryetarja Klodiana Spahiu, i fiku mikrofonin. Përplasje në Kuvend pati edhe mes deputetit demokrat, Klevis Balliu, dhe nënkryetares së Kuvendit, Spahiu, e cila nuk e lejoi të fliste për çështje tjetër, jashtë asaj që po diskutohej. Gjatë orëve të paradites, fokusi kryesor i debatit ishte te çështja e Zvërnecit. Foltoren e mbizotëruan Sali Berisha dhe Taulant Balla. Pas rreth 10 orësh debate në seancën plenare të së enjtes, u miratuan me votat e mazhorancës dy projektligjet në rendin e ditës, ai për produktet me origjinë shtazore dhe marrëveshja me Poloninë për sigurimet shoqërore.