Shkon në 11 numri i viktimave pas shembjes së çatisë së një kishe në verilindje të Meksikës. Sipas zyrtarëve, tragjedia goditi qytetin bregdetar të Ciudad Madero, në shtetin Tamaulipas, kur rreth 100 njerëz po merrnin pjesë në një pagëzim në kishën katolike Santa Cruz. Pas incidentit, dhjetëra persona mbetën të bllokuar brenda. Imazhet në mediat sociale treguan momentin e shembjes së ndërtesës së kishës, ndërsa njerëzit u grumbulluan rreth rrënojave, duke kërkuar dëshpërimisht për ata që ishin të zhdukur. Për të përkujtuar viktimat në qytetin bregdetar meksikan u mbajt edhe një meshë, ku të pranishmit u lutën për jetët e humbura dhe që familjarët e viktimave ta kalojnë sa më lehtë dhimbjen e madhe. Mediat vendase raportuan gjithashtu se mes viktimave autoritetet kanë identifikuar edhe fëmijë. Pamjet: AFP