Top Channel/Shembet miniera, vret minatorin në galerinë e Albchrom në Bulqizë. Arrestohet një person

Çdo ditë në këto galeri nën tokë hyjnë me qindra banorë të bulqizës në kërkim të kromit. Për ta kromi është buka e fëmijëve, por puna në galeri është e rrezikshme. Eltion Alla, babai i një djali të vogël dje hyri në këto galeri dhe prej andej doli i pa jetë. I ndjeri kishte ecur në gjurmët e të atit minator kromi dhe dje ishte duke punuar në nivelin e 18 të një prej galerive AlbChrom për të ndërtuar katrorin hyrës të nivelit të fundit. Por rreth orës 18:30 minuta, një masiv minerali është shkëputur duke e zënë poshtë Eltionin. Kolegët janë përpjekur ta nxjerrin por fatkeqësisht ai ishte i pajetë. Eltioni kishte vetëm një vit që kishte filluar punë si minator në galerinë e AlbChrom, duke zëvendësuar babain e tij i cili sapo kishte dalë në pension. Alla ishte djali i vetëm i familjes, duke lënë pas bashkëshortin dhe djalin e tij të mitur 2 vjeçar. Për minatorët e Bulqizës, jetesa është e vështirë. Kushtet e punës në galeritë e kromit u rrezikojnë atyre jetën çdo ditë ndërsa hyjnë dhjetëra metra thellësi në kërkim të mineralit.