Vetëm 24 orë pasi partia “Mundësia” kritikoi mënyrën se si u përzgjodh Florian Binaj si kandidat të opozitës për bashkinë e Tiranës, kryetari i saj njoftoi se do ta mbështesë kandidaturën e tij. Agron Shehaj deklaroi për Top Channel se nuk do të bëhet opozita e opozitës dhe se partia e tij do ta mbështesë Binajn në garën kundër Ogerta Manastirliut, pavarësisht se sipas tij Partia demokratike i preu në besë gjatë negociatave. I pyetur nëse ky ishte një hap pas nga ana e Shehajt nga konferenca për shtyp të së hënës, ai theksoi se nuk kishte qenë kundër kandidatit, por kundër mënyrës se si u bë procesi. Me mbështetjen e Agron Shehajt, kandidati i opozitës ka unanimitetin e të gjithë spektrit opozitar, duke filluar nga partia më e madhe, ajo demokratike dhe aleatët e saj, por edhe Shqipëria bëhet e Adriatik Lapajt si dhe Nisma Thurje e Endrit Shabanit.