Shpeshherë, kur marrëdhëniet politike mes Uashingtonit dhe Moskës bëhen të vështira për t’u menaxhuar përmes diplomacisë së zakonshme, atëherë në skenë hyjnë agjentët: Kreu i Agjencisë Qendrore të Inteligjencës së SHBA-së John Ratcliffe, ka udhëtuar drejt Moskës për bisedime të paparalajmëruara, raportoi CBS, dhe ndonëse thuhet se ai mbërriti në kryeqytetin rus të martën, asnjëra palë nuk e ka konfirmuar vizitën, qëllimin e saj apo zyrtarët me të cilët ai mund të takohet. Për shumë ekspertë, misioni i Ratcliffe, në Rusi i përket një tradite që daton që nga Lufta e Ftohtë dhe që ka mbijetuar edhe pas rënies së Bashkimit Sovjetik. Përfshirja e drejtuesve të shërbimeve të inteligjencës nuk do të thotë domosdoshmërisht se po përgatitet ndonjë marrëveshje e madhe, arsyetojnë ata, e ndonjëherë madje mund të tregojë të kundërtën: se marrëdhëniet janë përkeqësuar aq shumë sa nevojitet një kanal i rezervuar për të shmangur incidentet, për të përcjellë paralajmërime, për të diskutuar çështje të terrorizmit, armëve bërthamore apo shkëmbimit të të burgosurve. Pak para udhëtimit të Ratcliffe, shërbimet e inteligjencës zbuluan planet e Putinit për të ndërmarrë mobilizime të reja masive dhe për të kërcënuar korridorin e Suëalkit, i cili lidh Rusinë me enklavën e Kaliningradit, të vendosur mes Polonisë dhe Lituanisë. Të gjitha këto zhvillime janë shqetësuese për NATO-n. Mesazhet që kreu i CIA-s mund të ketë përcjellë mund të përfshijnë edhe paralajmërimin klasik: “Ne e dimë se çfarë po përgatitni dhe duam t’ju tregojmë pasojat.” Takimet e drejtpërdrejta mes zyrtarëve të lartë amerikanë dhe rusë janë të rralla, veçanërisht në kushtet e marrëdhënieve të tensionuara mes dy vendeve që prej pushtimit të plotë të Ukrainës nga Rusia në vitin 2022.