Shtetet e Bashkuara dhe Kina kanë pranuar të shtojnë angazhimin e përbashkët në luftën kundër ndryshimeve klimatike, me argumentin se këto përpjekje duhet të jenë në linjë me Marrëveshjen e Parisit për Klimën. Lajmi u njoftua përmes një deklarate të përbashkët, të lëshuar pas vizitës së të dërguarit amerikan për klimën John Kerry, në Shangai. “Shtetet e Bashkuara dhe Kina janë të përkushtuara që të bashkëpunojnë me njëra-tjetrën dhe me shtetet tjera, për të luftuar krizën klimatike, e cila duhet të trajtohet me seriozitetin dhe urgjencën që kërkon”, theksohej aty. Në deklaratë janë renditur disa fusha në të cilat SHBA-ja dhe Kina mund të bashkëpunojnë, përfshirë Marrëveshjen e Parisit për Klimën, të arritur më 2015. Kerry pati ndihmuar në nëgocjimin e marrëveshjes në Paris kur ishte sekretar amerikan i shtetit. SHBA-ja është tërhequr nga ujdia gjatë administratës së ish-presidentit Donald Trump, por presidenti amerikan Joe Biden e ktheu mbrapsht atë vendim, pak pasi mori celësat e zyrës ovale në muajin janar. Shtetet e Bashkuara dhe Kina do të punojnë në strategji afatgjate të zhvillimit, që synojnë neutralitetin e karbonit dhe maksimizimin e investimeve ndërkombëtare në mbështetje të kalimit në energji të ripërtrishme në vendet në zhvillim”, thane dy shtetet e konsideruara si ndotësit më të mëdhenj. SHBA dhe Kina janë përgjegjëse për gati gjysmën e emetimeve të gazrave shkaktare te efektit sere në botë.