Tre kongresmenë amerikanë, Keith Self, Ritchie Torres dhe Mike Lawler, paraqitën një rezolutë në Dhomën e Përfaqësuesve në mbështetje të anëtarësimit të Kosovës në NATO. Argumenti i tyre është se pjesëmarrja e Kosovës në aleancë është thelbësore për mbrojtjen e interesave të sigurisë kombëtare të Shteteve të Bashkuara në Europën Juglindore. Rezoluta me mbështetje dypartiake, thekson se qeverisja demokratike e Kosovës, kontrolli civil mbi forcat e sigurisë dhe bashkëjetesa multietnike e bëjnë vendin një kandidat të fortë për anëtarësim. Dokumenti gjithashtu argumenton se përfshirja e vendit në NATO do të shërbente si kundërpeshë ndaj forcave që përpiqen të destabilizojnë rajonin dhe do të ndihmonte në parandalimin e një katastrofe të mundshme globale në Ballkan. Anëtarësimi në NATO është një prej synimeve të Kosovës që nga shpallja e pavarësisë më 2008. Megjithatë, ai kërkon njëzëshmëri nga të gjitha vendet anëtare, dhe katër shtete ende nuk e njohin Kosovën: Greqia, Rumania, Sllovakia dhe Spanja. Keith Self, si nismëtar i rezolutës, insistoi që SHBA të ushtrojë presion për njohjen e Kosovës nga këto vende. Rezoluta është mirëpritur nga zyrtarët kosovarë. Ushtruesja e detyrës së presidentit të Kosovës, Albulena Haxhiu, shprehu mirënjohje për kongresmenët për “lidershipin dhe mbështetjen e tyre të vazhdueshme që Kosova ta zërë vendin që i takon në familjen euroatlantike”. Por ndërkohë nisma është kundërshtuar nga Serbia, me presidentin Aleksandar Vuçic që paralajmëroi se do ti kundërvihet përpjekjeve për integrimin e Kosovës në NATO.