Thesari i Shteteve të Bashkuara sanksionoi anëtarët e familjes shqiptare Hysa në Meksikë, nën akuzën se ka përdorur perandorinë e kazinove dhe restoranteve si mbulesë për pastrimin e parave të kartelit meksinan Sinaloa. Thesari amerikan tha se “Grupi i Krimit të Organizuar Hysa (HOCG) u godit pas një pune të përbashkët mes Shteteve të Bashkuara dhe Qeverisë së Meksikës". “Shtetet e Bashkuara dhe Meksika po punojnë së bashku për të luftuar pastrimin e parave në sektorin e lojërave të fatit në Meksikë. Mesazhi ynë për ata që mbështesin kartelet është i qartë: Do të mbaheni përgjegjës”, tha nënsekretari i Thesarit për Çështjet e Terrorizmit dhe Inteligjencën Financiare, John K. Hurley. Në listën e zezë janë futur 27 individë dhe entitete. Familja Hysa, me origjinë shqiptare, në të kaluarën ka mohuar publikisht çdo lidhje me krimin e organizuar. Por, sipas Thesarit, familja Hysa akuzohet se e ka përdorur ndikimin e vet përmes investimeve ose kontrollit mbi biznese të ndryshme me bazë në Meksikë - duke përfshirë lokale bastesh dhe restorante - për të pastruar paratë e përfituara nga trafiku i narkotikëve. Sipas Shteteve të Bashkuara, kjo familje vepron me pëlqimin e kartelit Sinaloa, i cili mban kontroll kriminal mbi pjesën më të madhe të territorit ku grupi zhvillon aktivitetet e tij. Me sanksionet e vëna këtë të enjte, çdo aset i familjes Hysa në SHBA, ose që varet nga sistemet financiare amerikane, është i bllokuar dhe nuk mund të përdoret pa aprovim, njoftoi Thesari amerikan.