Kanë kaluar për herë të parë të premten kamionë me ndihma humanitare për Rripin e Gazës. Ata hynë në enklavën e rrethuar përmes portit të ri të ndërtuar nga Shtetet e Bashkuara, pasi Izraeli ka kufizuar kalimet nëpër kufijtë tokësor. Zyrtarë ushtarakë të shba presin që të hyjnë në Rripin e Gazës deri në 150 kamionë në ditë me ndihma, ndërkohë që Izraeli po vazhdon luftën në qytetin e Rafahut kundër Hamasit. Megjithatë, SHBA paralajmëroi se projekti i portit nuk mund të zëvendësojë dërgesat tokësore, të cilat do të mund të sillnin të gjithë ushqimin, ujin dhe karburantin e nevojshëm në Gazë. Suksesi i operacionit për dërgesën e ndihmave vihet në rrezik nga sulmet, pengesat logjistike dhe për shkak të rritjes së mungesës së furnizimeve me karburante për kamionët që bartin ndihma. Kjo pasi Izraeli ka bllokuar dërgesat e karburanteve për në Rripin e Gazës pas nisjes së luftës më 7 tetor. Komanda Qendrore e Ushtrisë së SHBA-së tha se asnjë ushtar amerikan nuk ka marrë pjesë në këtë operacion. Trupat amerikane përfunduan ndërtimin e portit të enjten, ndërsa disa orë më vonë Pentagoni urdhëroi që të nisnin ndihmat humanitare, duke u koordinuar edhe me Kombet e Bashkuara. Pamjet: AFP