Vetëm pak orë pas paralajmërimit që dha presidenti Donald Trump nga Samiti i NATO-s në Ankara të Turqisë, Shtetet e Bashkuara të Amerikës nisën sulmet ajrore ndaj Iranit. Raundi i ri i sulmeve u njoftua nga Komanda Qendrore e SHBA. “Me udhëzimin e Komandantit të Përgjithshëm, forcat e Komandës Qendrore të SHBA-së kanë filluar të kryejnë sulme shtesë kundër Iranit për të degraduar më tej aftësinë e tyre për të kërcënuar lirinë e lundrimit në Ngushticën e Hormuzit”, thuhej në njoftim. Sipas Komandës Qendrore, “Shtetet e Bashkuara e cilësojnë Iranin përgjegjës për agresionin e pajustifikuar të kohëve të fundit kundër anijeve tregtare dhe ekuipazheve civile që lundrojnë lirshëm në një rrugë ujore ndërkombëtare jetësore”. Sulmet e reja ndaj Iranit erdhëm pasi vetë presidenti Donald Trump njoftoi se armëpushimi mes dy vendeve ka marrë fund. Duke folur në Samitin e NATO-s, Trump i quajti sërish udhëheqësit e Teheranit si “të çmendur”. "I njoha. Ata nuk po i bëjnë ndonjë shërbim popullit të tyre. Nuk jam i sigurt nëse dua të bëj një marrëveshje me ta, thjesht të përfundoj punën. Ata kishin udhëheqës, që nuk janë më. Tani kanë një grup tjetër udhëheqësish. Edhe ata mund të mos jenë më, kush e di? Dhe e dini çfarë? Mund të mos jem më as unë, sepse jam objektivi i tyre numër një... Jam objektivi i tyre kryesor, sepse ata janë fundërrina”. Menjëherë pas kërcënimit të Trump nga Samiti i NATO-s, u kundërpërgjigj Irani, duke paralajmëruar një reagim të njëjtë ndaj Shteteve të Bashkuara. Ministri i Jashtëm i Iranit, Abbas Araghchi, akuzoi SHBA për shkelje të memorandumit të mirëkuptimit, ndërsa theksoi se do t’i përgjigjen sulmeve amerikane me veprim. Pakistani, vendi që ndërmjetësoi në nënshkrimin e memorandumit mes Uashingtonit dhe Teheranit muajin e kaluar, shprehu shqetësim të thellë për përshkallëzimin e tensioneve në Lindjen e Mesme. “Konflikti nuk është në interes të askujt”, thanë autoritetet pakistaneze, duke iu bërë thirrje të gjitha palëve për përmbajtje. Edhe Sekretari i Përgjithshëm u OKB-së, Antonio Guterres, paralajmëroi pasoja katastrofike për paqen globale, mes tensioneve në rritje mes SHBA dhe Iranit, duke iu bërë thirrje palëve “të rinisin urgjent negociatat”.