Qendrat amerikane për kontrollin dhe parandalimin e sëmundjeve njoftuan se gjysma e të rriturve në SHBA e kanë marrë të paktën një dozë të vaksinës anti-covid, cka dëshmon qartë ritmet e shpejta me të cilat po kryhet vaksinimi në vendin më të prekur nga koronavirusi në botë. Gati 130 milionë njerëz, 18 vjeç e lart, kanë bërë të paktën dozën e parë të vaksinës, e kjo nënkupton 50.4 për qind të popullsisë. Ndërkohë, gati 84 milionë të rritur, apo një e treta e popullsisë, janë vaksinuar plotësisht.Dy vaksinat që përdoren aktualisht në SHBA, Pfizer/BioNTech dhe Moderna, duhet të jepen me nga dy doza, për të qenë sa më efektive.Vaksina e tretë Johnson&Johnson, që është pezulluar javën e kaluar, për shkak të disa raporteve se mund të shkaktojë mpiksje gjaku, jepet me një dozë të vetme. Ekspertet thonë se të gjitha vaksinat në dispozicion kanë dhënë prova se janë të efektshme në parandalimin e sëmundjeve të rënda, shtrimeve në spital dhe vdekjeve, edhe pse theksuan se me realizimin e më shumë vaksinimeve, presin që të ketë mijëra raste të tjera të infektimit të personave të imunizuar, pavarësisht se vaksina po funksionon ashtu siç pritej.