Shtetet e Bashkuara të Amerikës po e ndjekin hap pas hapi situatën në veri të Kosovës pas sulmit të një grupi terroristësh serbë që vranë policinë e Kosovës, ndërsa 4 prej tyre u qëlluan për vdekje në shkëmbimin e zjarrit që patën me policinë. Një ditë pas deklaratës së Departamentit Amerikan të Shtetit, vjen edhe një deklaratë nga John Kirby, zëdhënës i Këshillit të Sigurisë Kombëtare, i cili konfirmon tërheqjen e trupave ushtarake serbe nga kufiri me Kosovën. “Meqenëse ne deklaruam publikisht se i kishim parë forcat serbe në kufi, ne kemi verifikuar gjithashtu se Serbia ka filluar t'i largojnë forcat ushtarake nga kufiri i Kosovës. Dhe kjo është një gjë e mirë, që do të ndihmojë në de-përshkallëzimin e tensioneve - nuk do t'i eliminojë ato, por do të ndihmojë në de-përshkallëzimin e tyre.", tha zoti Kirby në një konferencë nga Shtëpia e Bardhë. Reagimi nga Uashingtoni për tërheqjen e forcave ushtarake serbe përgjatë kufirit me Kosovën vjen disa ditë pasi Shtetet e Bashkuara pasi shprehën shqetësimin për një grumbullim të madh ushtarak nga Serbia përgjatë kufirit me Kosovën, që sipas tyre përfshinte artileri të avancuar, tanke dhe njësi ushtarake të mekanizuara. Shtetet e Bashkuara e quajtën këtë grumbullim “të pashembullt” dhe i bënë thirrje Serbisë të tërheqë forcat e saj ushtarake nga kufiri me Kosovën. Sulmin e 24 shtatorit në fshatin Banjskë në pjesën veriore të Kosovës e mori përsipër Ish nënkryetari i Listës Serbe, Milan Radoiçiç, ndërkohë që të martën Ministria e Punëve të Brendshme të Serbisë njoftoi se ka arrestuar atë. Pamjet: AFP