Shtetet e Bashkuar të Amerikës I kanë kërkuar Izraelit që të mos I nis operacionet ushtarake kundër Hamasit në jug të Gazës derisa të merret në konsideratë siguria e civilëve palestinezë që po largohen. Zëvendës këshilltari për sigurinë kombëtare në Shtëpinë e Bardhë, Jon Finer tha për rrjetin televiziv CBC se Uashingtoni ua ka përcjellë drejtpërdrejtë, dhe se do tua përcjell sërish zyrtarëve izraelit këtë qëndrim. SHBA po përpiqet që të riktheje armëpushimin në Gaza ndërsa prej kohësh po negocion për lirimin e pengjeve nga Hamasi, çka ka nxitur dhe sulmin e ndërmarrë nga Izraeli, që tashmë synon shkatërrimin e të gjithë grupit. Ofensiva izraelite ka shkaktuar dëme të mëdha në pjesën veriore të rajonit, ndërsa rreth dy të tretat e popullsisë prej 2.3 milionë banorësh të Gazës, janë zhvendosur në jug. Sipas Ministrisë së Shëndetësisë së Gazës, që udhëhiqet nga Hamasi, deri tani janë vrarë rreth 12,300 palestinezë. Referuar këtyre shifrave, zyrtari amerikan I kërkoi Izraelit që sigurojë fillimisht mbrojtje të zgjeruar për popullatën civile duke ngushtuar zonat e luftimit aktiv dhe duke specifikuar se ku mund të strehohen civilët. Deklaratat erdhën pas njoftimit të bërë të shtunën nga ushtria Izraelite e cila njoftoi një tjetër ofensivë ushtarake në disa pjesë të jugut të Gazës.