Presidenti amerikan, Donald Trump, ka thënë se SHBA-ja do të ndërmarrë "masa shumë të forta" kundër Iranit nëse ai ekzekuton protestuesit. Deklarata e tij vjen pasi grupet e të drejtave të njeriut thanë se më shumë se 2,500 demonstrues antiqeveritarë janë vrarë në një shtypje të dhunshme nga autoritetet iraniane. Familjarët e një 26-vjeçari, Erfan Soltani, i cili u ndalua javën e kaluar, i kanë thënë BBC-së se ai do të ekzekutohet këtë javë. "Nëse i varin, do të shihni disa gjëra... Ne do të ndërmarrim masa shumë të forta nëse bëjnë një gjë të tillë", ka thënë Trumpi për “CBS News” duke folur për ekzekutimet e mundshme. Shtetet e Bashkuara të Amerikës po tërheqin personelin nga bazat kryesore në Lindje të Mesme si një masë paraprake, duke pasur parasysh tensionet e larta rajonale, ndërsa mediat ndërkombëtare njoftojnë se brenda 24 orëve të ardhshme mund të ketë një sulm ushtarak amerikan mbi bazat ushtarake të Iranit. Protestat në Iran kanë nisur më 28 dhjetor, si reagim ndaj rënies së monedhës vendëse “Rial” dhe inflacionit. Që atëherë, ato janë zgjeruar në shumë qytete duke u shndërruar në mbarëkombëtare.