Shtetet e Bashkuara të Amerikës dhe Irani kanë rënë dakord të tërhiqen pas një shkëmbimi sulmesh gjatë ditëve të fundit, shkruan BBC, duke cituar një zyrtar amerikan. Presidenti amerikan, Donald Trump, njoftoi se palët do të zhvillojnë bisedime të martën në kryeqytetin e Katarit, me kërkesë të Teheranit. "Irani ka kërkuar një takim. Do të zhvillohet nesër në Doha!", shkroi Trump në “TruthSocial”, pak orë pasi autoritetet iraniane kishin mohuar planet për bisedime teknike këtë javë. Pas njoftimit të Trump për bisedime në Doha, Sekretarja e Shtypit e Shtëpisë së Bardhë, Karoline Leavitt, tha se i dërguari special i SHBA-së, Steve Witkoff, dhe dhëndri i Trump, Jared Kushner, "do të fluturojnë drejt Katarit për takime të nivelit të lartë këtë javë". Kjo lëvizje vjen pas disa sulmeve në Ngushticën e Hormuzit, me të dyja vendet që akuzojnë njëra-tjetrën për shkelje të armëpushimit mes tyre. Zyrtari amerikan i cituar nga BBC tha po ashtu se anijet do të jenë në gjendje të lëvizin "lirisht" nëpër rrugën ujore të Gjirit dhe se bisedimet për një marrëveshje për t'i dhënë fund përgjithmonë luftës do të vazhdojnë. Më 17 qershor, SHBA-të dhe Irani nënshkruan një Memorandum Mirëkuptimi prej 14 pikash, që përfshinte një "ndërprerje të menjëhershme dhe të përhershme të operacioneve ushtarake në të gjitha frontet, si dhe kalimin e sigurt të anijeve tregtare në Hormuz pa pagesë për 60 ditë”. Por armëpushimi i rënë dakord më pak se dy javë më parë ka qenë nën kërcënim ditët e fundit, për shkak të sulmeve të përsëritura nga të dyja palët.