Tensionet mes Shteteve të Bashkuara dhe Iranit janë përshkallëzuar sërish, pasi Garda Revolucionare iraniane kërcënoi se do të mbajë të mbyllur Ngushticën e Hormuzit deri në përfundimin e asaj që e cilëson si "akte agresioni" nga SHBA. Teherani paralajmëroi gjithashtu se mund të bllokojë edhe rrugë të tjera rajonale të eksportit të naftës dhe gazit. Kërcënimi erdhi pasi Komanda Qendrore Amerikane (CENTCOM) njoftoi se ka zhvilluar një seri sulmesh me dronë, avionë dhe forca detare ndaj objektivave ushtarake iraniane, duke goditur mbrojtjen bregdetare dhe pozicionet e raketave lundruese në ishullin Greater Tunb. Përshkallëzimi i konfliktit ka rikthyer në qendër të vëmendjes rëndësinë strategjike të Ngushticës së Hormuzit për ekonominë globale. Trafiku i cisternave të naftës në këtë korridor detar është reduktuar ndjeshëm, ndërsa çmimet e naftës kanë shënuar rritje të fortë.