Ushtria amerikane ka vazhduar sulmet ndaj disa objektivave iraniane, një ditë pasi goditi në shenjë hakmarrje për një sulm me dron ndaj një anijeje mallrash në ngushticën e Hormuzit. Komanda Qendrore e SHBA-së tha se sulmet e saj ishin në “përgjigje të drejtpërdrejtë ndaj agresionit të vazhdueshëm iranian kundër anijeve tregtare” dhe se në përgjigje kishte synuar “infrastrukturën ushtarake të mbikëqyrjes së Iranit. Reagoi ashpër edhe presidenti Donald Trump, që kërcënoi se nëse SHBA godet me gjithë fuqinë, atëherë Irani nuk do të ekzistojë më. "Avionët luftarakë amerikanë sapo goditën depot iraniane të raketave dhe dronëve, si dhe vendet bregdetare të radarëve, për shkelje të marrëveshjes së armëpushimit... Përsëri! Ata me shumë mundësi nuk do ta mësojnë kurrë mësimin! Mund të vijë një kohë kur ne nuk do të jemi më në gjendje të përdorim arsyen dhe do të detyrohemi të përfundojmë ushtarakisht punën që kemi filluar me kaq sukses. Nëse kjo do të ndodhte, Republika Islamike e Iranit do të pushonte së ekzistuari." Nga ana tjetër Korpusi i Gardës Revolucionare Islamike të Iranit tha se kishte nisur një operacion të përbashkët me raketa dhe dronë që synonin tetë baza ushtarake amerikane në Kuvajt dhe Bahrein.