Shtëpia e Bardhë njoftoi se i dërguari special Steve Witkoff dhe Jared Kushner, dhëndri i presidentit amerikan Donald Trump, do të udhëtojnë për në Pakistan për bisedime që lidhen me Iranin, në një përpjekje të re diplomatike për të çuar përpara negociatat mes Teheranit dhe Uashingtonit. Sipas zëdhënëses së Shtëpisë së Bardhë, Karoline Leavitt, të dy zyrtarët amerikanë do të zhvillojnë takime në Islamabad, ku Pakistani do të luajë rolin e ndërmjetësit në bisedimet me palën iraniane. “Do të jenë në gatishmëri për të udhëtuar në Pakistan nëse është e nevojshme, por fillimisht Steve dhe Jared do të shkojnë për të raportuar tek presidenti, zëvendëspresidenti dhe ekipi i tij,” u shpreh Leavitt në një intervistë për Fox Neës. Mediat ndërkombëtare raportojnë se ministri i Jashtëm i Iranit, Abbas Aragchi, ka mbërritur në Islamabad për të diskutuar propozime që lidhen me rifillimin e bisedimeve të paqes me Shtetet e Bashkuara. Mediat raportuan se ai zuri vendin e kryeparlamentarit Mohamad Ghalibaf. Presidenti amerikan Donald Trump, në një prononcim për Reuters, deklaroi se Irani mund të paraqesë një ofertë të re në kuadër të kërkesave të SHBA-së, pa dhënë detaje mbi përmbajtjen e saj. Ndërkohë, sipas raportimeve nga Reuters, delegacioni iranian që pritet të marrë pjesë në bisedime këtë fundjavë ka mbërritur tashmë në Pakistan. Takimet mes palëve pritet të zhvillohen të shtunën në Islamabad. Paralelisht, Uashingtoni ka vendosur edhe sanksione të reja ndaj rrjeteve financiare iraniane, përfshirë ngrirjen e rreth 344 milionë dollarëve në kriptomonedha, sipas Departamentit amerikan të Thesarit.