Shtetet e Bashkuara ndërmorën të martën sulme të reja ndaj Iranit dhe rivendosën sanksionet mbi shitjet e naftës iraniane, në përgjigje të një sërë sulmesh ndaj anijeve tregtare pranë Ngushticës së Hormuzit. Në një deklaratë të publikuar në platformën X, Komanda Qendrore e SHBA-së (CENTCOM) njoftoi se forcat amerikane kanë “nisur një seri goditjesh të fuqishme ndaj Iranit për t’i imponuar kosto të rënda për shënjestrimin dhe sulmet ndaj anijeve tregtare me ekuipazhe civile në një rrugë ujore ndërkombëtare.” “Goditjet amerikane janë përgjigje ndaj sulmeve iraniane ndaj tre anijeve tregtare që po kalonin nëpër Ngushticën e Hormuzit. Agresioni i treguar nga Irani ishte i pajustifikuar, i rrezikshëm dhe një shkelje e qartë e armëpushimit”, thuhet në deklaratë. Deklarata u publikua menjëherë pasi SHBA riktheu sanksionet ekonomike ndaj Iranit. Këto masa përbëjnë një nga sfidat më serioze për armëpushimin e brishtë mes dy vendeve. Rivendosja e sanksioneve heq një nga lëshimet kryesore që Uashingtoni kishte bërë ndaj Teheranit në këmbim të rihapjes së lundrimit në Ngushticën e Hormuzit.