Shtetet e Bashkuara pritet të shpallin sanksione ndaj Rusisë lidhur me pretendimet për ndërhyrje në zgjedhje dhe veprimtari të dëmshme kibernetike, të cilat do të vënë në shënjestër disa individë dhe entitete, thanë burime të afërta me këtë çështje. Me këto sanksione, 30 subjekte hyjnë në listen e zezë amerikane, e do të ketë edhe urdhra për dëbimin e rreth 10 zyrtarëve rusë nga Shtetet e Bashkuara.Shtëpia e Bardhë, Departamenti i Shtetit dhe Departamenti i Thesarit, nuk iu përgjigjën menjëherë kërkesave për të komentuar të tilla pohime. Por është e qartë se një lëvizje e tillë do t`i acarojë edhe më shumë marrëdhëniet e ashpërsuara mes Uashingtonit dhe Moskës, që po e sprovon durimin e perëndimit me grumbullimet ushtarake pranë kufirit me Ukrainën. Sanksionet në shkallë të gjerë pritet të jenë një përgjigje ndaj shkeljes së sigurisë kibernetike që preku softuerin e krijuar nga kompania SolarËinds, për të cilin qeveria amerikan tha se ishte orkestruar me gjasë nga Rusia. Shkelja u dha hakerëve qasje në mijëra kompani dhe zyra qeveritare që përdorin produkte të kësaj kompanie. Presidenti i Microsoft Brad Smith e përshkroi sulmin, i cili u identifikua në dhjetor, si "më të madhin dhe të sofistikuarin që bota ka parë ndonjëherë".Shtetet e Bashkuara gjithashtu synojnë të ndëshkojnë Moskën lidhur me pretendimin për ndërhyrje në zgjedhjet presidenciale amerikane në vitin 2020. Në një raport të publikuar muajin e kaluar, agjencitë amerikane të zbulimit thanë se Presidenti rus Vladimir Putin ka të ngjarë të ketë urdhëruar një fushatë për të ndihmuar shanset për fitore të ish presidentit Trump.