Shtetet e Bashkuara shpallin një politikë të re kufizimi vizash ndaj trafikantëve të drogës dhe rrjeteve të tyre mbështetëse. Sekretari amerikan i Shtetit, Marco Rubio, njoftoi se masa e re do të zbatohet edhe për anëtarët e familjes, bashkëpunëtorët personalë dhe partnerët e biznesit të personave të përfshirë në trafikun e lëndëve narkotike. Vendimi mbështetet në Urdhrin Ekzekutiv 14059, i cili është firmosur nga Presidenti Joe Biden në dhjetor të vitit 2021. Ky urdhër parashikon sanksione financiare, ndalim udhëtimi, kufizim te vizave dhe bllokim të pasurive për çdo person të huaj që ka lidhje me tregtinë globale të paligjshme të drogës. Sekretari Rubio e cilësoi krizën e fentanilit si një nga më të rëndat ndonjëherë në SHBA, me mbi 220 vdekje në ditë vetëm gjatë vitit 2024, si pasojë e mbidozës.