Shtetet e Bashkuara sanksionuan politikanin serb Aleksandar Vulin, i cili drejton Agjencinë e Informacionit të Sigurisë së Serbisë, për trafikim armësh, lëndësh narkotike dhe korrupsion. Departamenti amerikan i Thesarit njoftoi se përcaktimi i Aleksandar Vulinit “nënvizon vendosmërinë e Shteteve të Bashkuara për të mbajtur përgjegjës ata që janë të përfshirë në marrëveshje korruptive dhe që çojnë përpara axhendat e tyre politike dhe interesat personale në kurriz të paqes dhe qëndrueshmërisë në Ballkanin Perëndimor. Në një njoftim të këtij departamenti thuhet e Aleksandar Vulin ka qenë i përfshirë në krimin e organizuar transnacional, operacione të paligjshme të narkotikëve dhe keqpërdorim të detyrës publike. Ai ka mbajtur një marrëdhënie të dobishme të ndërsjellë me tregtarin serb të armëve Slobodan Teshiç, po ashtu i sanksionuar nga Shtetet e Bashkuara, duke ndihmuar në sigurimin që dërgesat e paligjshme të armëve mund të lëvizin lirshëm nëpër kufijtë e Serbisë. Veprimet e Vulinit kanë çuar përpara korrupsionin brenda institucioneve qeverisëse të Serbisë. Këto veprime përfshijnë shfrytëzimin e autoritetit të tij për përfitime personale dhe përfshirjen në një rrjet të trafikut të drogës. Në njoftim thuhet se ai ka përdorur postet e tij publike për të mbështetur Rusinë, duke lehtësuar veprimtaritë ruse që dëmtojnë sigurinë dhe qëndrueshmërinë e Ballkanit Perëndimor. Aleksandar Vulin, një politikan pro rus ka shërbyer si ministër i Brendshëm i Serbisë në qeverinë e mëparshme dhe mbante postin e ministrit të Mbrojtjes më herët. Pamjet; AFP