Pak orë pasi presidenti amerikan Donald Trump akuzoi Iranin e kishte shkelur armëpushimin, forcat ushtarake të Shteteve të Bashkuara kryen sulme ajrore amerikane pranë Ngushticës së Hormuzit, një nga korridoret më të rëndësishme për transportin e naftës në botë. Sipas “Reuters”, që citon një zyrtar të administratës amerikane, objektivat e sulmeve ndodheshin në jug të Iranit, pranë Ngushticës së Hormuzit. Nga ana tjetër, mediat shtetërore iraniane raportuan se shpërthimet u dëgjuan në provincën Hormozgan, konkretisht në qytetin Shirik, pa dhënë ende një version zyrtar mbi shkakun apo objektivin e tyre. Zhvillimet vijnë vetëm pak orë pasi presidenti amerikan Donald Trump akuzoi Iranin për shkeljen e marrëveshjes së armëpushimit. Sipas tij, një dron iranian goditi një anije tregtare, duke dëmtuar kuvertën e sipërme, ndërsa tre dronë të tjerë u rrëzuan nga forcat amerikane. Edhe pse nuk bëri publik emrin e anijes apo kohën e saktë të incidentit, Trump e cilësoi sulmin si një “shkelje të pamend” të armëpushimit. Kur u pyet nëse Teherani do të përballet me pasoja për këtë veprim, presidenti amerikan u përgjigj shkurt: “Do ta zbuloni vetë”, duke lënë të kuptohet se Uashingtoni ishte gati të reagonte. SHBA-ja dhe Irani nënshkruan marrëveshjen e armëpushimit më 18 qershor, me synimin që brenda 60 ditëve të arrihej një marrëveshje përfundimtare. Megjithatë, që prej hyrjes në fuqi të saj, të dyja palët kanë shkëmbyer vazhdimisht akuza për shkelje të angazhimeve, duke ngritur pikëpyetje mbi qëndrueshmërinë e armëpushimit dhe rrezikun e një përshkallëzimi të ri në rajon.