Protestat e përgjakshme në Iran kanë hyrë në ditën e katërmbëdhjetë, ku raportohet për dhjetëra viktima dhe mijëra persona të arrestuar, përfshirë dhe adoleshentë e të mitur. Në një reagim të fundit, mes përshkallëzimit në rritje të protestave, presidenti amerikan, Donald Trump, del në mbrojtje të popullit iranian, teksa thekson se Shtetet e Bashkuara të Amerikës janë gati të ndërhyjnë. "Irani po shikon lirinë, ndoshta si kurrë më parë. SHBA-të janë gati të ndihmojnë!!!", shkruan kreu i Shtëpisë së Bardhë, ndërsa nga Irani vijnë dëshmi tronditëse. Mjekët dhe stafet e disa spitaleve i thanë BBC-së se qindra të vdekur e të plagosur kanë mbingarkuar spitalet, duke bërë të pamundur dhënien e ndihmës. Një punonjës spitali e përshoi situatën të tmerrshme, teksa tha për BBC se “kishte aq shumë të plagosur, sa stafi nuk mund t’i ndihmonte. Shumë vdiqën sapo mbërritën në urgjencë, ishin kryesisht të rinj 20-25 vjeç, të qëlluar në kokë. Numri ishte aq i madh, sa nuk kishte hapësirë në morg”, u shpreh punonjësi i spitalit. Protestat filluan në kryeqytetin Teheran dy javë më parë për shkak të vështirësive ekonomike, duke u përhapur në më shumë se 100 qytete dhe qyteza në të gjitha provincat e Iranit. Për shkak të ndërprerjes së internetit në mbarë vendin në Iran, vetëm disa regjistrime arritën të shpërndaheshin. Popullsia është shkëputur nga pjesa tjetër e botës për më shumë se 24 orë. Shumë pamje të siguruara deri më tani megjithatë tregojnë zjarre dhe skena kaotike në rrugë, ndërsa disa prej tubuesve thërrasin: "Vdekje diktatorit. Protestat nisën për shkak të devalvimit të monedhës, por ndërkohë intensiteti i tyre dhe thirrjet e demonstruesve dëshmojnë se kërkohet ndryshimi i regjimit.