Shtetet e Bashkuara të Amerikës festojnë këtë 4 korrik 250-vjetorin e Pavarësisë. Në këtë ditë të shënuar për kombin amerikan janë parashikuar një sërë aktivitetesh, përfshirë një festë që do të organizojë Presidenti Donald Trump. Dita e Pavarësisë së SHBA-së ka në bazë të saj ushqimet dhe kulturën amerikane: paradat, gatimet në ambient të hapur, si dhe fishekzjarrët. Komisioni i krijuar nga Kongresi Amerikan për festimet e 250-vjetorit të Pavarësisë tha se po organizon festa në disa qytete. Presidenti Donald Trump pritet të mbajë një fjalim në ambient të hapur, në festën e 4 korrikut. "Do të mbaj një fjalim vërtet të gjatë vetëm për të treguar se mund të bëj gjithçka", tha Presidenti Trump. Më 4 korrik të vitit 1776, Kongresi Kontinental miratoi bashkërisht Deklaratën e Pavarësisë, një dokument përmes të cilit kolonitë amerikane njoftuan shkëputjen nga Britania e Madhe. Një vit më vonë, në Filadelfia pati festime spontane për të shënuar përvjetorin e Pavarësisë së Shteteve të Bashkuara. Festimet megjithatë do të bëheshin pjesë e kulturës së përbashkët vetëm pas luftës së vitit 1812. John Adams, një prej etërve themelues të kombit amerikan, insistonte që përkujtimi i pavarësisë së Amerikës “të kremtohet plot madhështi, me parada, shfaqje, lojëra, sporte, kambana, zjarre, dhe ndriçime nga njëri skaj i kontinentit tek tjetri, tani dhe përgjithmonë”. Për shumë amerikanë, 4 korriku është gjithashtu një shans për të lënë mënjanë dallimet politike dhe për të festuar bashkimin, duke reflektuar mbi revolucionin që solli në jetë demokracinë më jetëgjatë në histori.