Asambleja e Përgjithshme e Kombeve të Bashkuara ka mbështetur një rezolutë të hartuar nga Ukraina dhe Bashkimi Evropian që dënon agresionin rus. Votimi i kësaj rezolute erdhi pas një debati të ashpër dhe një përplasjeje diplomatike që pasqyron thellimin e hendekut mes SHBA-ve dhe Evropës. Rezoluta, nëpërmjet së cilës kërkohet që Rusia të tërheqë trupat e saj nga territori ukrainas dhe ta njohë atë si një shtet viktimë të agresionit, mori mbështetje të gjerë me 93 vota pro. Megjithatë, 18 shtete, përfshirë SHBA-në, Rusinë, Bjellorusinë dhe Korenë e Veriut, votuan kundër, duke theksuar përçarjet e thella midis fuqive të mëdha. Rezoluta e propozuar nga Shtetet e Bashkuara të Amerikës, e cila kërkonte një fund të shpejtë të luftës, por pa akuzuar drejtpërdrejt Rusinë për agresionin, nuk arriti të kalonte. Misioni i Shteteve të Bashkuara në OKB e ndryshoi qëndrimin e tij për rezolutën në mbështetje të Ukrainës, menjëherë pas miratimit nga Asambleja e Përgjithshme. SHBA-të fillimisht kishin votuar kundër, por më pas ambasadorja shpjegoi se kishte pasur një gabim në përdorimin e butonit, duke thënë se votimi ishte abstenim dhe jo kundër. Edhe Izraeli abstenoi. Ky votim shënoi një moment kyç në politikën globale, duke nxjerrë në pah tensionet në rritje midis fuqive perëndimore, si dhe ndikimin që ka konflikti në Ukrainë në marrëdhëniet ndërkombëtare. Administrata e Trump ka shfaqur qartë një qasje më të butë ndaj Moskës dhe ka theksuar nevojën për të arritur një marrëveshje paqeje që mund të përfshijë zhvillimin ekonomik të Ukrainës dhe Rusisë, duke shmangur përpjekjet për të fajësuar drejtpërdrejt Kremlinin.