Sekretari amerikan i Shtetit, Marco Rubio, ka thënë se planifikon të takohet me zyrtarë danezë javën e ardhshme për të diskutuar për Groenlandën, ndërsa një krizë po përshkallëzohet brenda NATO-s për shkak të kërcënimeve të presidentit Donald Trump për të marrë territorin e Arktikut. Një takim urgjent ishte kërkuar nga ministrat e jashtëm të Groenlandës dhe Danimarkës, e cila ka thënë se çdo pushtim ose marrje e territorit nga aleati i saj në NATO do të shënonte fundin e aleancës ushtarake perëndimore dhe "sigurisë pas Luftës së Dytë Botërore". Duke folur me gazetarët në Ëashington, Rubio nuk iu përgjigj drejtpërdrejt një pyetjeje nëse administrata Trump ishte e gatshme të rrezikonte aleancën duke avancuar me një opsion ushtarak për të fituar kontrollin e Groenlandës. "Nuk jam këtu për të folur për Danimarkën apo ndërhyrjen ushtarake, do të takohem me ta javën e ardhshme. Do t'i zhvillojmë bisedat me ta kur të vijë momenti, por nuk kam asgjë tjetër për të shtuar për këtë”, tha ai. Franca ka thënë se po punon me aleatët se si t’i përgjigjen nëse SHBA-ja pushton Groenlandën. “Duam të veprojmë, por duam ta bëjmë bashkë me aleatët evropianë”, ka theksuar ministri i Jashtëm, Barrot.