Departamenti amerikan i Shtetit njoftoi se Shtetet e Bashkuara dhe Serbia do të nënshkruajnë javën e ardhshme një marrëveshje për bashkëpunim strategjik në fushën e energjisë. Nga sa pohon DASH, kjo marrëveshje do të zgjerojë mundësitë e kompanive amerikane për të investuar në sektorin energjetik të Serbisë, “përfshirë promovimin e investimeve amerikane që do të forcojnë marrëdhëniet SHBA-Serbi”. Në ceremoninë zyrtare të nënshkrimit të mërkurën më 18 shtator, Nënsekretari i Shtetit për Rritjen Ekonomike, Energjinë dhe Mjedisin, Jose W. Fernandez dhe Ministri i Jashtëm serb Marko Gjuriç pritet të japin dhe shpjegime më të detajuara mbi ujdinë. Korrikun e këtij viti, Serbia nënshkroi me Bashkimin Europian një marrëveshje për partneritet strategjik në fushat e lëndëve të para të qëndrueshme, zinxhirëve të prodhimit të baterive dhe makinave elektrike. Marrëveshja pasoi vendimin e autoriteteve në Serbi për të çuar përpara projektin për minierën e litiumit, që pritet të përmbushë një pjesë të kërkesës europiane për këtë produkt. BE-ja është aktualisht e varur nga Kina kur vjen fjala për lititumin që përdoret gjerësisht në bateritë e makinave elektrike, të telefonave të mençur dhe laptopë. Por Europa duket se synon të ulë varësinë nga të tjerët duke krijuar struktura të qëndrueshme në zinxhirët e furnizimit.